Ֆեյսբուքի ադրբեջանցի օգտատերերը տարածում են երկրում նոր կորոնավիրուսից մահացած բժիշկների ցուցակ՝ 34 բժիշկների անուններով։ Մենք ստուգեցինք ցուցակում նշված անունները և կարողացանք 34-ից 33-ի՝ կորոնավիրուսից մահանալու փաստը հաստատող այլ աղբյուրներ գտնել։ Այսպիսով, տվյալ ցուցակը կարող ենք համարել հավաստի։ Մահացածներից 2-ը գլխավոր բժիշկներ են, 2-ն էլ՝ բաժնի վարիչներ։ Մահացած բժիշկներից մեկը ՀՀ Տավուշի մարզին սահմանակից Ղազախի շրջանից է։

Ցուցակը ստուգելիս պարզեցինք, որ նշված բժիշկներից մեկն ապրում և աշխատում էր Թուրքիայում, որտեղ էլ մահացել է կորոնավիրուսից։ Մյուս կողմից՝ ցուցակում ընդգրկված չէ մայոր, ռազմաբժիշկ Ջաֆարով Թեյմուր Օքթայ օղլուն, որն Ադրբեջանի զինված ուժերի գլխավոր կլինիկական հոսպիտալում աշխատում էր որպես ռեանիմատոլոգ-անեսթեզիոլոգ։

Ավելորդ չի լինի նշել, որ ցուցակում միայն բժիշկների անուններ են, այլ բուժանձնակազմ (բուժքույրեր, սանիտարներ և այլն) չկա։

Ըստ պաշտոնական տվյալների՝ օգոստոսի 4-ի դրությամբ Ադրբեջանում կորոնավիրուսից մահացել է 473 մարդ։ Այսինքն ստացվում է, որ մահացած բժիշկները (և սա՝ չհաշված մնացած բուժանձնակազմը) կազմում են այդ թվի շուրջ 7%-ը։

Ստեղծված իրավիճակը պարզաբանելու համար կարող ենք ենթադրել, որ

  • Ադրբեջանում բժիշկները չափազանց խոցելի ու անպաշտպան են, այդ պատճառով շատ են մահերը;
  • Կորոնավիրուսից մահվան իրական թվերը շատ ավելի մեծ են, քան Ադրբեջանը պաշտոնապես է հայտարարում։

Ադրբեջանում COVID-19-ից մահացած բժիշկների ցուցակ

Նշենք, որ կորոնավիրուսից մահացած բուժաշխատողների հիշատակի նմանատիպ ցուցակ կա Ռուսաստանում։ Այն կազմում են մահացածների ծանոթները, գործընկերները, այդ պատճառով ցուցակի տվյալները որոշակիորեն տարբերվում են երկրի առողջապահության նախարարության տվյալներից։ Ըստ այդ ցուցակի՝ օգոստոսի 4-ի դրությամբ ՌԴ-ում COVID-19-ից մահացել է 620 բուժաշխատող։

Եթե անգամ համեմատում ենք այս ոչ պաշտոնական տվյալների հետ (որտեղ ընդգրկված են ոչ միայն բժիշկների, այլ ընդհանրապես բուժաշխատողների անուններ), Ռուսաստանում կորոնավիրուսից բուժաշխատողների մահվան ցուցանիշը կազմում է ընդամենը 4,3%։

Մեկ այլ համեմատություն․ ապրիլի 27-ին, այդ ժամանակ համաճարակի խոշոր կենտրոններից մեկը համարվող Իտալիայում, կորոնավիրուսից մահացել էր շուրջ 26 921 մարդ, որոնցից 151-ը՝ բժիշկ։ Այսինքն՝ բժիշկների մահացության ցուցանիշն ընդամենը 0,6% էր։

Հավելենք, որ Ադրբեջանի ՊՆ-ի կողմից կորոնավիրուսից մահացած ռազմաբժշկի մասին տեղեկությունը չթաքցնելը ևս կարող է հուշել երկրի զինված ուժերում իրական պատկերի՝ առավել մտահոգիչ լինելու մասին։

Նշենք, որ Հայաստանում կորոնավիրուսի հետևանքով մահացած առաջին բուժաշխատողի մասին առողջապահության նախարար Արսեն Թորոսյանը հայտնել է հունիսի 23-ին։ Հուլիսի 22-ին գրանցվել է բուժաշխատողների մահվան երկու դեպք (1, 2): Վերջին՝ չորրորդ դեպքը գրանցվել է հուլիսի 30-ին։ Սա նշանակում է, որ պաշտոնական տվյալներով Հայաստանում COVID-19-ից բուժաշխատողների մահացության ցուցանիշը 0,5% է։