Ապրիլի 29-ին Ադրբեջանի նախագահը խորհրդարանի հավանությանն է ներկայացրել գլխավոր դատախազի նոր թեքնածուին՝ Քամրան Ալիևին, ով ներկայումս դատախազի տեղակալն է, կոռուպցիայի դեմ պայքարի գլխավոր վարչության պետը:
Քամրան Ալիևը ամենայն հավանականությամբ դատախազ կնշանակվի խորհրդարանի առաջիկա պլենար նիստին: Պատգամավոր Ֆազաիլ Աղամալին հայտնել է, որ այսօր թեկնածությունը քննարկվել է խորհրդարանի իրավական քաղաքականության և պետականաշինության կոմիտեի առցանց նիստում. փոխանցում է ԱՊԱ լրատվական գործակալությունը:
Այսպիսով՝ պաշտոնին հրաժեշտ է տալիս Ադրբեջանի երկարամյա գլխավոր դատախազ Զաքիր Գարալովը: Հատկանշական է, որ նա պաշտոնին էր նշանակվել ուղիղ 20 տարի առաջ՝ 2000 թվականի ապրիլի 25-ին:
Նախորդ տարի Ադրբեջանում եղան քաղաքական լուրջ վերադասավորումներ, ինչի արդյունքում առանցքային պաշտոններից դուրս մղվեցին «հին գվարդիայի»՝ Հեյդար Ալիևի ժամանակներից մնացած կադրերը, ամրապնդեցին իրենց դիրքերը Ի. Ալիևի կնոջ՝ Մեհրիբան Ալիևայի ներկայացուցիչները: Պաշտոնից ազատվեց ՆԳՆ վաղեմի նախարար Ռամիլ Ուսուբովը, փոխվեց վարչապետը, ազատվեց նախագահի աշխատակազմի 26 տարվա ղեկավար Ռամիզ Մեհդիևը, ինչից հետո լուրջ փոփոխություններ եղան նախագահի աշխատակազմում:
Եղան նաև այլ վերադասավորումներ ուժային համակարգում, օրինակ՝ պետանվտանգության ծառայության պետ Մադաթ Ղուլիևը տեղափոխվեց ռազմարդյունաբերության նախարարի պաշտոնին, նոր պետ նշանակվեց նրա տեղակալը, ընդ որում՝ կրկին կոռուպցիայի դեմ պայքարի գծով:
Գլխավոր դատախազի այս փոփոխությունը ևս հնարավոր է, որ հենց վերադասավորումների քաղաքականության հետևանք է:
